Teknologia berrietan eta Interneten euskararen presentzia eta erabilera areagotzeko asmoarekin sortu berri da Azkue Fundazioa. Hizkuntzen normalizazioan teknologia berriek duten garrantziaz jabetuta, fundazioak sarean hainbat baliabide elektroniko sortuko ditu, eta jada Interneten dauden ekimenak bildu eta indartuko ditu. Atzo arratsaldean, Bilbon, Euskalduna jauregian aurkeztu egin zuten.